Manipur college zirlaiten class kal phut

Manipur-a government college zirlaite chuan class kal an phut thu sawiin, dan pangngaia class chhunzawm a nih thuai loh chuan nawrh huaihawt an tum tih an sawi. 

Covid-19 hripui leng vanga hun rei tak zirna in khar a nih hnuin, January 27 aṭang khan school leh college-te hi hawn leh ṭan an ni. Mahse zirna chhunzawm a nih hnuah government college-a zirtirtute chuan 7th UGC Pay and Regulation 2018 hman phutin nawrh an huaihawt zui a, February 18 aṭang khan class pawh an la tawh lo a ni. 

Zirlaite chuan class an kal chhunzawm leh thuai theihna atan state sorkar chu zirtirtute nawrh huaihawt mek titawp tura hma la turin an phut a, state sorkarin dan pangngai anga class an kal theihna tura hma a la thei lo a nih chuan zirlaite chuan nawrh huaihawt an tum tih an sawi.