Hmarchhak 'hero' Conrad Sangma Guwahati-ah ropui takin lo hmuak

Hmarchhak mipui ten nasa taka an dodal, Citizenship Amendment Bill, 2016 a tlawlh theih nana nasa taka hma la tu, Meghalaya Chief Minister leh National People’s Party (NPP) president ni bawk Conrad K. Sangma chu Ningani tlai khan Guwahati-a Lokapriya Gopinath Bardoloi International Airport-ah ropui taka lo hmuah a ni.

Guwahati-ah hian Conrad Sangma chibai buk duh mi sang chuang in an lo hmuak a ni.

Citizenship Amendment Bill tlawlh hi hmarchhak mipuite tana chuan hnehna ropui tak a ni a, Conrad Sangma hi bill tihtawp a nih hma zawng Delhi-ah a cham a, bill duh lo lama vote thlak turin party dangte thlawpna a zawng a ni.

Political party leh non-governmental organisation hruaitu hrang hrangte chuan Conrad Sangma an fak nasa hle a, Rajya Sabha-a CAB a tlawlh theihna atana hma nasa taka latu Sangma chu an chawimawi thiam hle bawk.

Asom Gana Parishad (AGP) president Atul Bora chuan BJP communal politics laka hmarchhak inpumkhatna thlentu Conrad Sangma hnena lawmthu sawi chu a ngai hle tih a sawi.

All Assam Students’ Union (AASU) advisor Samujjal Bhattacharyya chuan BJP kaihhruai North East Democratic Alliance-a tel zinga mi an ni reng chunga huaisen tak leh nghet taka hmarchhak tana hlauhawm tak bill lakah Sangma chu huai takin a ding ngam tih sawiin, hmarchhak ram neitute chuan an inlungruala theihna an neih san zia lantirtu a nih thu a sawi bawk.

AASU general secretary Lurinjyoti Gogoi chuan Sangma chu democracy chhanhimnaa tura thawhhlawk tak a nih thu sawiin, bill kha pawm nise chuan hmarchhak mipui tan chuan thil hlauhawm tak a nih tur thu a sawi.

Lurinjyoti Gogoi chuan mipuite chuan Assam CM Sarbananda Sonowal chu Sangma hnathawh ang a thawh an beisei laiin, mipuite duhdan chu ti hlawhchhamin bill a thlawp tih a sawi. Sangma chuan mahni indah ṭha in a tawp thleng a bei tih sawiin, hmarchhak ram neitute tana beihna kawnga hmahruai reng tlak a nih thu a sawi a ni.

NPP Meghalaya unit chief W R Kharluki chuan Sangma chuan a tih tur diktak a tih thu a sawi. A pa PA Sangma hnung a zui em tih zawhna chu chhangin Kharluki chuan a pa hnung chu a zui nia a hriat thu a sawi a, mahni kan inṭanpui a nih loh chuan tumahin min ṭanpui dawn lo a ni tia sawiin, politics tak pawhin hmarchhak chak zawk kan mamawh a ni, a ti.

Assamese scholar Hiren Gohain chuan Sangma chu RS-a CAB  a tlawlhna tura hma la tu pawimawh tak a nih thu sawiin, BJP a thawhpuina aṭanga inhnuhdawha a vauna chuan awmzia a nei hle tih a sawi.

Nagaland unit NPP pawhin an national president chu fakin CAB dodalnaa nasa taka a thawhna chu an fak hle a ni.    

Meghalaya CM Conrad Sangma hian CAB hi a tir aṭang khan nasa takin a dodal a, hmarchhhak chief minister zinga dodal hmasa ber a nih thu report ṭhenkhat chuan an tarlang. Lok Sabha-a bill pawm a nih hnu phei kha chuan a dodal nasa lehzual hle a ni.

January 29 khan CAB dodalna chungchang sawi turin  AGP nena ṭangkawpin Guwahati-ah meeting an huaihawt a, hei hi Sangma hmalakna anga ngaih theih a ni bawk. Hemi ṭum hian hmarchhaka BJP kaihhruai NDA member pawh an tel ṭha hle a, CAB dodalna resolution na tak an siam a ni.

Hemi hnu hian a kaihhruaina hnuaiah hmarchhak political party-te chu Delhi-ah thlawk thla nghalin, Union Home Minister Rajnath Singh an hmu a, CAB an duh lohna thute an sawipui a ni. Rajnath Singh mai bakah hian Prime Minister Narendra Modi pawh vawihnih lai hmuh an tum a, mahse PM chuan chhuanlam dang siamin a ṭhulhsan ve ve a ni.

Nasa taka hmarchhak mipuiten CAB an dodal chungin sorkar laipui leh BJP lam chuan CAB thlawp zawng leh a ṭhatna lam hawizawnga thu an sawi zel avangin Conrad Sangma chuan bill pawm a nih chuan NEDA aṭanga an party an inhnuhdawh tur thu a sawi hial.  An party meeting chuan,a kaihhruaina hnuaiah he thutlukna an siam a ni a, hei hian awmzia a nei hle nia ngaih a ni bawk.

Delhi-ah vawi eng emaw zat thlawk thla in Rajya Sabha-a bill thlawp lo lama vote thlak turin political party hruaitu hrang hrang thlawpna chu a kaihhruaina hnuaiah zawnkual a ni a, NDA member mai bakah NDA-a an thawhpui ni lo eptu lamte thlengin thlawpna a dil a ni.

CAB an pawm dawn takngiala hriain Pathianni liamta pawh khan chawpchilh takin Delhi-ah a thlawk thla leh nghal a, party dang thlawpna a zawng leh nghal char char bawk.

CAB tlawlh theihna atan hian hmarchhaka political party hrang hrangte chuan hma nasa takin la ve bawk mah se Conrad Sangma hi kawng tam bera a hnarkaitu ber a tih loh theih loh a, hei hi hmarchhak mipuite pawhin an hmuh hmaih bik lo a, Ningani-a Delhi aṭanga a haw pawh ropui takin, mi tam takin 'Hero'-ah chhalin an lo hmuak a ni.

Conrad Sangma chuan anti-bill move­ment in rahchhuah ṭha tak a neih chhan chu thawhhona vang a nih thu a sawi a, hmarchhak state pasariha political party hrang hrang te, vun rawng hrang hrang te, sakhua leh ṭawng hrang hrang hmangten inlungruala an thawhhona vang a nih thu a sawi. Ang khat duha an beih chuan engmah lian lua a awm lo tih a sawi bawk.