Hmarchhak minister zawng zawngin CAB an dodal dawn: AP CM

Arunachal Pradesh chief minister Pema Khandu chuan sorkar laipuiin Citizenship Amendment Bill (CAB) a thar­thawh leh a nih chuan, amah bakah hmarchhaka a minister pui zawng zawngte chuan an dodal dawn tih a sawi.

Pema Khandu hian a hma pawhin assembly-ah Bill hi an pharh leh dawn a nih pawhin tribal state-te huam tir lo turin sorkar laipui chu a ngen tawh tih a lo sawi tawh bawk. Assembly-ah Congress MLA Ninong Ering-a'n Bill kalpui ni ta se engtianga ram leilung fate humhim tum nge an ni tih a zawhna chu chhangin Khandu chuan sorkar laipui hnenah bill kalpui lo tura an ngen dawn thu a sawi.

Khandu chuan, "January 8 khan Lok Sabha-ah bill hi pawm ni mah se Rajya Sabha-ah pharh a ni lo. Manipur chief minister nen Delhi-ah kalin khatih hunlaia home minister Rajnath Singh hnenah khan bill pawm a nih chuan eng nge thleng thei tih kan hrilh a ni. Hmarchhak ram neitute dikna chanvo a tidal thei a ni tih kan hrilh," a ti.

Hetihlai hian July 1 khan Amit Shah chuan Rajya Sabha-ah ram ṭhenawm aṭanga lo lut Hindu-te khua leh tui nihna pekna turin Citizenship Bill pharh a ni dawn tih a sawi thung. Arunachal CM chuan sorkar laipuiin Bill chu a pulut leh a nih chuan, hmarchhak Chief Minister-te chuan inthurualin an dodal dawn tih a sawi a ni.

CAB hi Lok Sabha-a pharh a nih hmasak khan nasa taka dodal a ni a, hmarchhak mipuite chu a dodal nasa ber an ni.