CBI-in AP sorkar ngenna a hnawl

Central Bureau of Investigation (CBI) chuan Arunachal Pradesh sorkarin Ojing Taying thah thubuai chhui tura a ngenna chu a hnawlsak. 

Assembly rorel inkhawma Ques­tion Hour-ah Congress MLA Niong Ering-a zawhna chhangin, home minister Bamang Felix chuan CBI hian nikum August thla khan state sorkar  hnenah lehkha thawnin, he case hi an lak theih loh tur thu an hrilh tih a sawi. 

Zirlai hruaitu Taying hi kum 2017, June 10 khan Niti Vihar area-ah misual­ten na takin kut an thlak a, ni kaw hnuah Guwahati hospital-ah a thi a ni. Itanagar police station-ah thubuai ziahluh a ni a, SIT kuta hlan zui a ni bawk. Mahse he thubuai chhui kawngah hian SIT hian hma an sawn loh avangin home commissioner chuan CBI chhui tir a dil a ni. 

Felix chuan police department chuan he tualthahna thlengah hian rinhlelh mi pakhat chu an man tawh tih a sawi a, department chuan theihtawp chhuahin tualthattute manchhuah ngei tumin a bei mek a ni, a ti. State sorkar chuan kum 2018 khan tualthattua rinhlelh chanchin hrilh thei hnenah lawmman cheng nuai khat pek a lo tiam tawh a, sorkar thar a din hnuah lawmman hi cheng nuai thumah tihpun a ni leh tawh bawk.