PM-in Assam-ah mega project 5 a hawng

Prime minister Narendra Modi chuan Thawhṭanni khan Assam state tlawhin mega gas and oil based project panga, cheng vaibelchhe 3,222 hu a hawng. 

Dhemaji district-a Silapathar-a vantlang inkhawm buatsaihah thu sawiin, PM chuan sorka laipui leh Assam sorkar chuan state hmasawnna leh mipuite dinhmun chawikanna turin theihtawp chhuahin an thawk dun a ni, a ti. "Assam sorkar chuan sector hrang hranga hmasawnna hna a thawk a, national education polcy pawh hman thuai a ni dawn a, hemi hmang hian tualchhung mipuite chuan anmahni ṭawng ngeiin medical leh engineering education te an zir thei dawn a ni," tiin a sawi. 

Narendra Modi chuan sorkar hmasa sawisel zuiin, "Sorkar hmasate khan connectivity, health, edcuation, infrastructure leh industry-te an ngaihthah hle a ni," a ti. Silapathar khuaa hun hmanah hian union minister for petroleum and natural gas Dharmendra Pradhan pawh thu sawiin, PM hmalaknain Assam gas and oil sector tan Rs vbc 95,000 invest a ni dawn tih a sawi bawk. 

Pradhan chuan sorkar hmasa, Congress kaihhruai UPA sorkar khan Assam leh India ram pumin an chhawr theih turin gas leh oil resources lam haichhuahna kawngah hma an la lo tih a sawi. PM Modi hian mega project panga a hawn bakah, Dhemaji Engineering College hawngin Sualkuchi Engineering College  lungphum a phum nghal bawk. 

Dhemaji Engineering College hi ram bigha 276-a zauah cheng vaibelche 45 senga sak a ni a, Assam-a government engineering college parsaihna a ni. He college-ah hian Civil, Mechanical leh Computer Science-ah B.Tech course a zir theih ang. Sualkuchi Engineering College hi bigha 116-a zauah Rs vbc 55 senga sak tur a ni.