Nagaland : Petrol leh diesel chhiah tihniam
Nagaland sorkar chuan Thawhṭanni aṭang khan state chhunga petrol, diesel leh motor spirits-a chhiah a lak chu a tihniam.
Finance department-in thuchhuah a siamah petrol leh motor spirits danga chhiah lak chu litre khatah Rs 18.26 aṭangin Rs 16.04 (29.80% aṭangin 25% ) ah a tihniam a, diesel litre khatah chhiah lak Rs 11.08 chu Rs 10.51 ( 17.50% aṭangin 16.50%) ah a tihniam bawk.
Sorkarin chhiah lak a tihhniam avang hian diesel hi retail price litre khat Rs 0.57 leh petrol leh motor spirits dang litre khat Rs 2.22 in a tlahniam thei dawn a ni. Thawhṭanni khan Kohima-ah petrol hi litre khat Rs 93.93 niin, diesel litre khat Rs 84.65 a ni.
Flasghip AMRUT programme tan Rs vbc 120.21 dah
Nagaland-a Atal Mission for Rejuvenation and Urban Transformation (AMRUT) kalpuina turin cheng vaibelchhe 120.21 dah a ni.
Report hi Nagaland Legislative Assembly (NLA) neih zawh taka urban development department annual administrative report 2020-21 pharhah hei hi tarlan niin, he programme hian project 27 huamin heng zinga project pali chu thawh zawh a ni tawh a, a dang 24 chu thawh mek niin 65% vel an thawh tawh bawk.
AMRUT hi centrally sponsored scheme (CSS) niin kum 2015 aṭanga kalpui ṭan a ni a, he scheme-in mission city a huam zingah Kohima leh Dimapur-te an tel. Urban area tana infrastructure pekna tur niin, kum nga chhung atan ruahman a ni a, nikum March 31 khan a term hi a tawp a, mahse sorkar laipui chuan kum khat dang a pawtsei leh a ni.
Nagaland sorkar hian he scheme kalpuina tur hian sorkar laipui aṭangin cheng vaibelchhe 33.65 a dawng tawh a ni.