Manipur : Zirlai leh police innawr buainaah 10 chuangin hliam tuar

Manipur-a college zirlaiten class neih chhunzawm phuta Thawhṭannia Imphal-a nawrh an huaihawtnaah police-te nen innawr buaiin, mi 10 chuangin hliam an tuar. 

College zirtirtuten 7th UGC Pay and Regulations, 2018 hman phuta an nawrh avangin February 17 aṭang khan class an la tawh lo a ni. Hun rei tak hripui leng vanga zirna in kharte hawn theih a nih hnu lawkah, zirtirtu nawrh vanga class an kal chhunzawm leh theih loh chungchangah state sorkar chu hma la a, zirtirtu thil phut chu a rang thei anga ngaihtuah sak turin an phut a ni. Sorkar nawr nan college hrang hranga zirlaite chuan an college bulah lungawilohna nawrh an huaihawt zui a ni. 

Imphal-a Dhana­manjuri University hnuaia college panga zirlaiten nawrh  huaihawtte chuan budget session neih mekna, Assembly House lam pan an tum a, police-ten lo dangin, an innawr buai zui a ni. Police-te hian zirlaite hnawhdarh nan hian tiang an hman bakah, tear gas pawh an hmang tel nia sawi a ni. 

All Manipur Students’ Union (AMSU) leh Democratic Students’ Alliance of Manipur (DESAM) bakah zirlai pawl hrang hrang chuan zirlai nawrh huaihawtte chunga police-te chet dan demna thu an chhuah  nghal. 

Hetih lai hian college zirtirtute hian hlawhbi thar hman phut hian Federation of Government College Teachers’ Asso­ciation (FEGOCTA) hmingin an college ṭheuhah sit-in protest an huaihawt chhunzawm zel a, sorkarin an thil phut remtihna thupek a tihchhuah hma chuan nawrh zel an tum tih an sawi. FEGOCTA hian 7th UGC Pay and Regulations, 2018 hman phutin Thawhlehni thleng khan ni 22 chhung lungawi lohna an lantir tawh a ni.