Manipur: Nepal mi 179 ruk bo te thawn haw

Nepal mi, mihring hmanga sumdawnna tuartu mi 179-te chu Pathianni khan Manipur aṭanga thawn haw an ni. 

Heng mite hi kar hnih liamta chhung khan Manipur hmun hrang hrangah chhanchhuah an ni a, an zinga 147 hi hmeichhe naupang an ni. 

Chief Minister N. Biren Singh pawh heng mite thawn hawna hunah hian tel ve in, bus pariat hmangin Nepal ramah thawn haw an ni a, Nepal Embassy counsellor Pravash Adhikari chuan a endik vek a ni. Manipur Social Welfare Department leh police-te chuan Indo-Nepal border thleng an veng bawk.

CM N. Biren Singh chuan state chhunga mihring hmanga sumdawnna a awm lohna turin hma an la reng tih sawiin, border-a police station zawng zawng-te chu inralring reng tura hriattir an nih thu leh, uluk taka enfiahna kalpui tura an hriattir thu a sawi.

Biren Singh chuan Social Welfare Department, police leh NGO-te chu chhanchhuah hna an thawhna avangin lawmthu a hrilh. Heng rukbote hi ramdanga hna hmuhsak tiamin an bumchhuak a, Myanmar lama hruai tum an nih thu tarlan a ni.

Police-te chuan ṭhenkhat chu Imphal International Airport aṭanga an chhanchhuah te an nih thu sawiin ṭhenkhat erawh chu bus stand leh hotel-ah te an hmu niin an sawi. Hemi chungchangah hian mi pathum man an nih thu an sawi bawk.

Manipur police-te chuan hetiang thil hi a thlen vawikhatna a nih loh thu sawiin, Rohingya hmeichhe eng emaw zat chu a hma pawhin an chhanchhuah tawh thu an sawi. Manipur hmeichhe naupangte ngei pawh state dangah leh ramdangah te rukbo an ni ṭhin tih an sawi a ni.