Assam tuilianin chhiatna thlen nasa

Assam state-ah fur ruahtui sur nasa vangin chhiatna, hmun hrang hrangah a thleng a; district 33 zinga 21 a cheng mihring nuai riat chuangte chu tuilian hian a ti buai a ni. 

Brahmaputra lui chu Assam khawpui Guwahati-ah luang lutin hlauhawm chhinchhiahna a pel tawh a, lui dang pangate pawhin hlauhawm chhinchhiahna an pel tawh bawk. Tuilian vang hian mi paruk in nunna an chan tawh a, mi nuai 8.7 vel nunphung a khaihlak.

Khawchin zirtuten ruah sur zual zel tura an sawi vangin Zir­tawpni aṭang khan state chhunga chhanchhuah hna thawk lawngte chu chawlhtir vek an ni. Thlai chinna hmun ram hectares 27,000 chuang chu tuiin a chim tawh a, mi 7,000 vel chu relief camp-ah thiarchhuah an ni tawh bawk.

Tuilianin chhiatna a thlen nasat vangin sipaite chu chhan­chhuah leh chhawmdawl hnathawktu National Disaster Response Force leh State Disaster Response Force-te pui turin koh an ni. Assam State Disaster Ma­nagement Authority (ASDMA) te chuan Chirang, Barpeta leh Baksa-ah chuan khaw 1,556 chu tuilianin a chim pil tih an sawi. Kaziranga National Park (KNP) pawh tuilian hian 70% a chim tawh a, Kaziranga Divisional Forest Officer Ruhini Saikia chuan KNP paltlang National Highway ah te chuan fimkhur thilah motor tlanchak lutuk tur vennan road barricades dah a ni tih a sawi. CrPC Section 144 chu park chhehvel huamchhungah hian puan a ni a, Karbi Anglong hills hmun sang lam chu ramsate hian sahim nan an pan a ni.

State chhung district hrang hrangah buh chinna hmun ram eng emaw zat tuilian hian a chim a, rel kawng, kawngpui, lei, tuiluankawr leh thil tam tak tuilian hian a ti chhia. State chhung district 11-ah relief camp 68 leh distribution center siam a ni a, buhfai quintal 1,281.35, dal, chi, tel liter 1493.46, tarpaulin eng emaw zat leh naute chaw leh thildang chi hrang hrangte chhiat tawkte tan hian pek a ni.