Meghalaya-in India ramah Water Policy nei hmasa ber

Meghalaya cabinet chuan, kar kal ta Zirtawpni khan State Water Policy, 2019 draft chu a pawm a; India rama Water Policy nei thei hmasa ber a ni. 

Water Policy hi kum 2015 khan Meghalaya sorkar hmasaah khan duan tawh ni mah se, chhan hrang hrang avangin sorkar hmasa hian Cabinet-ah an pu lut hleithei lo. Sorkar hmasain Water Policy hi an kal pui theih lohna chhan lian tak pakhat chu, Autonomous District Council (ADC) pathum ten an thlawp ṭhat tawk loh vang a ni. Water Resources department-in consultation meeting an koh ah pawh ADC pathumte hian an draft policy an submit loh mai bakah meeting-ah hian an kal lo.   

Deputy chief minister hlui Rowel Lyngdoh-an Water Resources department in-charge a nih laiin, na takin ADC ho awm dan a lo sawisel tawh a. Sorkar department te Water Policy chungchanga an chet muan thu leh an ngaihtuah tawk loh thu a lo sawi tawh bawk.  

Meghalaya sorkar leh German International Cooperation (GIZ) ṭang kawpin Water Policy hi an duang a. GIZ hian tui renchemna kawnga hmalak dan tur leh inven dan turte ram hrang hrang an lo thawh pui tawh ṭhin. Mahse Germany agency-ina thurawn an pek hi Meghalaya sorkar hian a hmang zui dawn em tih a hriat loh.

Meghalaya chief minister Conrad K Sangma chuan thla hlui khan an State Cabinet-in draft water policy hi an en fiah vek ang a ti a; Zirtawpni khan enfiahin pawm a ni ta a ni. Deputy chief minister Prestone Tynsong chuan, "Ngun taka he draft Water Policy hi ngaihtuah a nih hnuah, thuthlukna kan state sorkar chuan a siam thei a, India ram a Water Policy nei thei hmasa ber kan ni ta a ni. Water Policy hmalak dan tur hi a kimchangin mipui chhiar theih turin sorkar chuan a la tarlang vat ang", a ti bawk.