IPFT-ten PM Modi leh Amit Shah hmu dawn

Tripura-a Bharatiya Janata Party (BJP)-in sorkarna an siampui, Indigenous People’s Front of Tripura (IPFT) chuan tunkar chhung hian state hran an phut chungchangah Prime Minister, Home Minister leh central minister dangte an hmu dawn.

IPFT party hruaitu pakhat chuan hemi chungchang hi sawiin, New Delhi panin Agartala an chhuahsan thuai dawn tih a sawi a, prime minister Narendra Modi, home minister Amit Shah leh central minister dangte an hmu dawn tih hi a sawi. An ruahman dan chuan vawiin leh naktuk hian hmuh hman an tum tih a sawi bawk. IPFT general secretary leh forest minister ni bawk Mevar Kumar Jamatia chuan, state hran an phut chungchang bakah, Tripura-a tribal-te hmasawnna tur chungchang an sawipui dawn bawk tih a sawi. 

IPFT hian 2009 aṭang khan Tripura Tribal Areas Autonomous District Council (TTAADC) chu state-a hlankai an ngiat tawh a, helai district-ah hian mi 12,16,000 vel an cheng a ni. Tripura-a tribal political party upa ber  Indigenous Natio­nalist Party of Tripura (INPT), eptu party Congress, CPI-M leh rorel lai BJP-te chuan IPFT thil phut hi an dodal thung.

IPFT thupuangtu leh party assistant general secretary Mangal Debbarma chuan sorkar laipui hruaitute hmu tur hian an party aiawh mi 15 an kal dawn tih a sawi a, party president leh revenue minister Narendra Chandra Debbarma chuan a kaihruai dawn tih a sawi bawk.