Hmarchhak hmun hrang hrangah tuilianin Harsatna thlen nasa

Tunhnai ruahsur nasa avanga hmarchhak hmun hrang hranga tuilian chuan ziaawm lam a pan thei lo. Hmun hrang hrangah leimin a thlen bakah tuilian vang hian mi mak­taduai chuangin harsatna an tawk mek bawk.

Assam-ah chuan tuilian vang hian mi maktaduai chuangin an chenna in an chhuahsan tawh a, Inrinni thleng khan mi 10-in an thih phah tawh a ni.

Brahmaputra lui lian vangin thingtlang khaw 1,800 velin harsatna an tawk a, tuilian hian ziaawm lam a la pan thei lo bawk. Assam-ah hian district 25-in tuilian hi an tuar a, ruah a la sur chhunzawm zel avangin Brahmaputra pawh hi  a la len belh zel tura ngaih a ni bawk. 

Assam water resources minister Keshab Mahanta chuan tuilian chu a la hlauhawm hle tih a sawi. Kaziranga National Park 70% vel chu tuilian hian a chîm tawh nia sawi a ni a, ramsa ṭhenkhat chu an tlahlum tawh nia sawi a ni bawk. Hetihlai hian ramsa ṭhenkhat chu an chhan hman thung.

Arunachal Pradesh chuan tuilian mai piah lamah leimin an tuar nasa hle a, hemi avang hian tui thianghlim in tur supply-na kawngah pawh harsatna an tawk nasa hle. Hmun ṭhenkhat phei chu biakpawh an harsa hle a ni.

Public health engineering department assistant engineer Tadung Padung chuan tui lakna hmun tam tak chu lei nawi a tam avangin a inhnawh tih a sawi. Tui lakna ṭhen­khat erawh hman lailawk theih turin an siam thung a, tuilian a kam hunah erawh an siam ṭhat theih thuai dawn thu a sawi bawk.

Tui thianghlim lakna chhia hian East Siang district a nghawng nasa ber a, Lower Dibang Valley district chu tuilian tuar nasa an ni thung. Hunli leh Desal inkar kawng, Border Road Task Force-ten an hman nasat ber pawh leiminin a hnawh a, lui tam tak chuan an kuang an zauh nasa hle bawk.

Paglam-ah pawh tuilian hi an tuar nasa hle a, in ṭhenkhatte lenchhiain, naupang pakhat pawh kar liam ta Ningani aṭang khan chin hriat lohin a la awm a ni.

Meghalaya-a West Garo Hills chuan tuilian vangin harsatna an tawk mek a, kar liam ta kar tawpah ruahsur a nasat zual avangin plain area-a awmte chuan harsatna an tawk nasa hle.

WGH-ah hian mi nuai 1.1 chuangin harsatna hi an tawk nia tarlan a ni a, ruah hi a la sur chhunzawm zel a nih chuan mi tam zawk a la nghawng dawn a ni. While Demdema Block chuan khaw 50 vel tuilian hian a nghawng tih an record a, mi 57,700 velin an tuar nia chhut a ni. Selsella Block chuan khaw 104 vel a nghawng tih an ziaklut ve bawk a, hetah hian mi 66,400 vel an cheng nia chhut a ni bawk.

Ruah a la sur zel avangin tui hi a la len belh zel a, thuneitu lam pawhin ni sarih chhung chhawmdawl hna thawh a ni phawt dawn tih an puang tawh. Rajabala Congress MLA Dr Azad Zaman chuan tui chu a la len belh zel rin a nih thu sawiin, mi tam zawkin harsatna an la tawk dawn tih a sawi. Thil awmdan chu an thlithlai reng tih a sawi bawk.

Meghalaya hian ruahsur nasat avangin kar hmasa lamah pawh khan East Khasi Hills hmun ṭhenkhatah chuan tuilian leh leimin vangin harsatna nasa tak an lo tawk tawh bawk a ni.

Tripura-ah pawh tuilian vangin district pangain harsatna an tawk a, West Tripura district chu a tuar nasa ber an ni.

Chief minister Biplap Kumar Deb chuan thil awmdan an enfiah reng tih a sawi a, chhawm­dawl hna pawh thawh a nih thu a sawi. South Tripura district-ah chuan mi pakhat tuiah a tlahlum tih report a awm tawh bawk.

State khawpui Agaratala-ah chuan Pathianni pawh khan ruah a la sur nasa hle a, Indian Meteorological Department chuan ruah hi ni hnih chhung vel a la sur chhunzawm dawn tih an sawi. Tuilian hian chhungkaw 1,185 vel a nghawng nia sawi a ni a, West Tripura leh Khowai district-ah relief camp 28 siam a ni bawk.

Tuilian hian Sepahijala, South Tripura leh Gomati district-te pawh a nghawng nasa hle a ni.