Meghalaya : Umiam Lake thianfaitu tur panel din dawn

Meghalaya chief minister Conrad Sangma chuan Umiam Lake-a plastic bawlhhlawh tam tak awm mek thenfai hna thawktu tur committee din a rawt. 

Umiam Lake-a plastic bawlhhlawh tam tak tlingkhawmte chu Social media lamah thehdarh a ni a, hei hi sorkar lam thuneitute chuan an ngaihven zui nghal a ni. 

Chief minister Sangma chuan department hrang hranga official-te chu mee­ting neihpuiin, Umiam Lake chungchang hi a sawipui. Meeting-ah hian social media lama thlalak thehdarh, he dila plastic bawlhhlawh tam tak awmkhawm leh 'Plastic Umiam Lake' tia an sawina chu official-te a entir nghal bawk. 

Sangma chuan dil thenfai dan tur ngaih­tuahtu Forest Department, District Administration, MeECL, Shillong Muni­cipal Board, District Council, leh Water Re­sources Department aiawhte telna committee din a rawt a ni. 

Hetihlai hian official-te chuan thlalak thehdarh hi tunhnaia lak ni loin, thlalak hlui a ni an ti thung. Mahse CM chuan eng hun ami pawh ni se, dil tihthianghlim dan chu ngaihtuah vat a ṭul thu sawiin, sorkar chuan long term-a kalpui dan tur pawh a ngaihtuah dawn a ni, a ti. 

CM chuan state khaw­puia faina kalpui a pawi­mawh thu a sawi bawk a, official hrang hrangte berawnin, Shillong khaw­pui fai leh thianghlim taka siamna a nih theihna tura kalpui dan tur a sawipui dawn tih a sawi.