Assam-ah tuilian vangin mi 17 thi tawh

Assam-ah chuan tuilian vangin mi 17-in nunna an chan tawh a, mi nuai 44.96 velin tuilian hi an tuar.

Assam-a tuilian hian district 32 a nghawng a, leimin vangin mi pahnih an thi tawh bawk tih  Assam State Disaster Management Authority (ASDMA) chuan a sawi. Tuilian hian Kaziranga National Park (KNP) 90% vel chu a chim a, ramsa eng emaw zat an thi tawh bawk. Ramsate hi hmun sang lamah sawn an ni a, forest official, district leh sub-divisional thuneitute chuan chhawmdawl hna an thawk a ni.

Morigaon-ah mi paliin tuilian vang hian nunna an chan a, Golaghat-ah mi pathum. Dhemaji, Jorhat leh Nagaon-ah mi pahnih ṭheuh, Barpeta, Dhubri, Goalpara leh Hailakand-a mi pakhat ṭheuhten nunna hi an chan bawk. 

Nilaini thleng kha chuan revenue circle 124-a thingtlang khaw 4,620 chuan tuilian hi an tuar mek a ni.

Regional Meteorology Centre (RMC), Guwahati chuan ruahtui a tla tlem deuh ṭan tawh tih leh hmun ṭhenkhatah chuan khua a ro ṭan tawh tih an sawi. Tunah hian relief camp 226 an siam a, hetah hian mi 1,01,085-ah awm mek a, chhawmdawl hna thawhna hmun centre 562 a awm mek a ni. 

National Disaster Response Force (NDRF) leh State Disaster Response Force (SDRF)-te chuan chhawmdawl hna an thawk reng bawk a, hmun 16-ah chhanchhuah hna thawk tur lawng dah a ni bawk.

Tuilian nasa tak an tawrh chungchangah hian prime minister Narendra Modi pawhin Assam chief minister Sarbananda Sonowal a be tawh a, Sonowal hian thil awmdan a lo hrilhfiah a ni.

Narendra Modi chuan sorkar laipui aṭangin a theih ang anga chhawmdawlna kawnga ṭanpui a lo tiam tawh bawk. PM bakah hian union home minister Amit Shah leh Sonowal hi Inrinni liam ta khan an inbia a, Amit Shah chuan NDRF leh agency dangte chu an theih anga chaka chhawmdawl hna thawk turin a hriattir nghal a ni.

Sorkar laipui chuan Assam SDRF (State Disaster Response Fund) tan a thawh khatna ni turin cheng vaibelchhe 251.55 a pe chhuak.

Tuilian hi a kam hnuah kawngpui chhia, building chhia leh siamṭhat ngai eng emaw zat a awm ngei dawn tih a chiang a, sorkar laipui aṭanga chhawmdawlna pawisa lo kal hian state sorkar chu a chhawk zângkhai ngei rin a ni.

SDRF tan hian kum 2019-20 fiscal year chhung hian budget cheng vaibelchhe 559 dah a ni a, tuna mi hi chu first installment chiah a la ni thung.

Disaster response fund hi sorkar laipui leh state sorkar hian 90:10-in an intum sem a ni.