Nagaland-a zirna tihchangtlunna turin World Bank nen USD mtd 68 hu project siam
Sorkar laipui, Nagaland sorkar leh World Bank chuan Thawhlehni khan Nagaland state-a zirna tihchangtlun a, school hrang hranga inrelbawlna ṭha zawk kalpuina turin USD maktaduai 68 hu project an ziak.
Press Information Bureau (PIB) report-in a tarlan danin, ‘Nagaland: Enhancing Classroom Teaching and Resources Project’hmang hian classroom-a zirtirna kalpui dan te tihchangtlun a ni dawn a, zirlai leh zirtirtute tan technology system ṭha zawk siam a ni bawk ang.
He project atana World Bank Task Team leader leh education specialist, Kumar Vivek chuan state sorkarin school hrang hrangah zirna a kalpui dan siamṭhat leh tihchangtlunna turin he project hian a pui dawn a, zirlaite chu ngaih pawimawh ber niin, technology changtlung zawk leh zirna kalphung ṭha zawkte kalpui a ni ang, a ti. He hmalakna hi state chhunga zirlai 1,50,000 leh zirtirtu 20,000 ten an chhawr ṭangkai thei dawn a ni.
Inremna an siamah hian sorkar laipui aiawhin finance ministry-a Department of Economic Affairs-a additional secretary CS Mohapatra, Nagaland sorkar aiawhin Directorate of School Education princial director Shanavas C leh World Bank aiawhin India-a country director Junaid Ahmad-ten an hming an ziak a ni.