Nawrh kan tawpsan mai dawn lo : FEGOCTA

Manipur-a college zirtirtu, Federation of Government College Teachers’ Association (FEGOCTA)  hminga nawrh huaihawtte chuan 7th Pay and Regulations, 2018 hman phuta nawrh an huaihawt chu an tawpsan mai dawn lo tih an sawi. 

Thawhlehni khan zirtirtute hian hlawh bi thar hman phutin Imphal-a rally neih an tum a, college hrang hrang aṭangin Maharaja Budhachandra College-ah an kalkhawm a ni. Mahse he hmun aṭanga rally neih an tum chu police-ten 'riot gear' nen an lo dang a ni. 

FEGOCTA chuan rally an neih tur dan an ni leh, February 22-a zirtirtute thlawpna lantira zirlai naupang nawrh huaihawtte chunga police-te tharum an hmang chu an dem thu an sawi. An pawl general secretary Dr N Somorendro chuan  an thil phut tihhlawhtlin a nih a, UGC policy hmanna tura state sorkarin thuchhuahte a siam hma chuan nawrh chu tawpsan mai an tum dawn lo tih a sawi. Hlawhbi thar hmanna tur hi state cabinet pawhin a  pawmsak vek tawh niin an sawi bawk. 

Zirtirtute hian an thil phut nawrna atan hian hun eng emaw chen class an la tawh lo a ni. Hei vang hian college zirlaite chuan class an kal chhunzawm theihna turin zirtirtu thil phut chungchang hi ngaihtuah sak thuai turin state sorkar an phut ve bawk a ni.