NESO, AASU ten Umwali mite beihnaah Assam police-te dem Meghalaya MLA in Assam police-te lakah FIR thehlut

Meghalaya-Assam inter­state border-a Umwali-a buai­na chhuak chungchangah All Assam Students’ Union (AASU) leh North East Students’ Organi­sation (NESO) te chuan Assam police-te an dem thu an sawi.

AASU leh NESO hian Feb­ruary 14-a buaina chhuaka Umwali tualchhung mite laka Assam police-te chet dan chu an dem thu an sawi a ni.

AASU chuan thuchhuah an siamah police mipa, ralthuam keng ten hmeichhia kut an thlak chu thil mak tak a nih thu leh a mihring chetdan lo hle nia an hriat thu an sawi a, police-te laka hremna lekkawh ngei an phut thu sawiin, ramri buaina reng reng chu sorkar pahnihin an chinfel tur a nih thu an sawi.

NESO pawhin hemi chung­changa police-te chet dan chu demin he buaina chhuaka inhnamhnawihte chu hrem ngei an phut thu an sawi ve bawk.

Ningani liamta khan West Khasi Hills-a Langpih bula Umwali-ah hian local firm, M/S Dhar Construction-te chuan electric poles leh connection tihna turte an buaipui niin Assam police-te chuan an sawi a, Meghalaya  Electrical Development Project kalpui tumna hmun chu an state chin a nih thu an sawi. 

Hemi a nih avang hian police-te chuan mi pakhat an man tih an sawi a, hemi duh lo hian tualchhung mite chuan police-te chu an tawng a, an inkarah buaina a chhuah phah a ni.   

Langpih local MLA, Kimfa S Marbaniang chuan Assam police-te lakah hian FIR a thehlut a, tualchhung mite kut an thlak avang hian FIR hi thehlutin, hmeichhia laka kut an thlak thu a ziaklang.

Kar liamtaa buaina chhuakah hian mi 28 velin hliam an tuar a ni.