IPFT hruaituten state hran an phut chungchangah Sorkar laipui hotute meeting neihpui

Tripura-a Bharatiya Janata Party (BJP)-in a thawhpui, Indigenous People’s Front of Tripura (IPFT) chuan hun rei tak an state hran pe tura an lo phut tawh chungchangah sorkar laipuia hruaitute an hmu.

IPFT hian hunrei tak chhung Tipraland phutin sorkar an nawr a, Thawhṭanni leh Thawhlehni khan hemi chungchangah hian sorkar laipuia hruaitu hrang hrang an hmu a, an hlawhtling hle tih an sawi bawk. IPFT aiawh hian party president leh revenue minister Narendra Chandra Debbarma leh party general secretary leh tribal welfare minister Mevar Kumar Jamatia chuan, an thil phut chungchangah hian union home minister Amit Shah, DoNER minister Jitendra Singh leh forest and environment minister Prakash Javadekar-te an hmu a ni.

IPFT hian kum 2009 aṭang tawh khan statehood movement hi an kalpui tawh a, Tripura Tribal Areas Auto­nomous District Council (TTAADC) chu state-a hlankai an phut. TTAADC-ah hian mi  12,16,000 vel an cheng. A hma kha chuan state hran an phut chungchang hi sorkar laipuiin an bengkhawn vak lo ṭhin a, mahse tun ṭuma IPFT hruaitute Delh-a kalte hi chuan hlawhtling an inti viau thung. Nilaini-a Agartala Airport an thlen velah IPFT minister Mebar Jamatia chuan thuthar thehdarhtute hnenah an hlawh­tling hle tih a sawi nghal.