Meghalaya CM-in sorkar laipui puihna dil
Meghalaya chief minister Conrad Sangma chuan New Delhi-ah union finance minister Nirmala Sitharaman hmuin, an state-a development project hrang hrang kalpuina tura sum pek belh turin a ngen. Chief minister hi Meghalaya tourism and excise minister Metbah Lyngdoh-a'n a ṭawiawm a ni.
Meeting an neihah hian Meghalaya CM chuan an state sum dinhmun kimchangte chu union finance minister hnenah hian a hrilh a, state sorkarin sum lakluh belhna tura hmalakna hrang hrang a siamte pawh a hrilh bawk.
Conrad Sangma chuan finance minister hi National Games 2022 an thlen tur chungchang pawh sawipuiin, sorkar laipui puihna a ngen nghal bawk a ni.
Sangma hian 15th Finance Commission chairman NK Singh pawh a lo hmu tawh bawk a, state sorkarin sector pawimawh hrang hrang - human development, primary sector, infrastructure development leh enterprise development lama hmasawnna thlen tura hma a lak dante a sawipui a ni. Chairman hnenah hian supplementary memorandum thehlutin, hetah hian state tana project pawimawh palite tarlan a ni a; heng project-te hi kum 2020-25 chhunga kalpuina tur, cheng vaibelchhe 4,340 pe tura ngennate a ziak tel.