Cabinet-in AP-a 2880 MW Dibang multipurpose project pawm

Prime minister Narendra Modi kaihhruai cabinet committee on economic affairs chuan Nilaini khan Arunachal Pradesh-a Dibang Mul­tipurpose Project (MPP) a pre-investment leh clearance hrang hrang tihna tura sum hman hmasak tur cheng vai­belchhe 1,600 a pawm. 

Project pumpui senso tur hi cheng vaibelchhe 28,080.35 tura ruahman a ni a, kum kaw chhunga zawhfel tura tih a ni bawk. He project hi zawhfel a nih hnuah power 2880 MW pe chhuak thei tura ngaih a ni a, hei hi India ram chhunga hydro electric project lian ber a ni. Zawh a nih hunah chuan Arunachal Pradesh hian he project aṭang hian power 12% chu a thlawnin a dawng thei dawn a ni. State-in he project aṭanga hlawkna a tel, power a thlawna a dawn tur leh Local Area Development Fund (LADF) atana a dawn tur hlut zawng chu kum 40 chhungin cheng vaibelchhe 26,785 a tling ang. 

2880 MW Dibang multipurpose project hi Lowe Dibang Valley district-a Dibang luia siam a ni. Concrete Gra­tivy Dam chu meter 278-a sangah siam a ni a,  India rama 'dam' sang ber a ni dawn bawk. Head rece tunnel paruk, meter 300-600 a sei siam a ni dawn a, Project thawhna tura atan hian clearance pawimawh, TEC, envi­ronment clearance, forest clearance (stage I) leh defence clearance te neih a ni tawh. 

Dibang multipurpose project lungphum hi kum 2008 January thla khan khatihlaia prime minister Manmohan Singh chuan a lo phum tawh a, mahse project siamna tur hian ram eng emaw zat tih­chhiat a ngaih dawn avangin tualchhung miten an dodal a; hei vang hian kalpui mai theih lohin hun rei tak tihkhawtlai a lo ni tawh a ni.