Nagaland RIIN Tribal body leh Civil society-ten a thuphungin pawm

Nagaland sorkarin July 10 aṭanga a kalpui ṭan - Register of Indigenous Inhabitants (RIIN) chu Tribal body leh civil society-te chuan a thuphungin an pawm tawh. RIIN policy-te chu vantlang hmaah puanzar a ni dawn tih an sawi bawk.

RIIN hnuaiah Assam NRC ang deuhin ram leilung fate chhinchhiah an ni dawn a, Tribal body-te leh civil society-te hian chief minister Neiphiu Rio-a'n meeting a neihpui hnuah RIIN hi a thuphungin an pawm phawt a ni. 

Meeting-ah hian Tribal leh civil society-te bakah hian  NDPP leh BJP MLA-te pawh an tel a, hetihlai hian eptu party NPF chu meeting-ah hian an tel ve duh lo thung. Eastern Nagaland Peoples’ Organisation, Naga Mothers Association,Naga Students’ Federation, Eastern Nagaland Students Federation leh Eastern Nagaland Women Organisation-te an tel bawk.

State home commissioner R. Ramakhrishnan chuan hemi chungchanga thuchhuah a lo siam tawhah RIIN chu July 10 aṭanga hmanṭan a nih tur thu leh ni 60 chhunga kalpui zawh hman an tum thu a lo sawi tawh a ni. Mahse hemi hnu hian mi hrang hrang chuan an sawisel nghal a, hel pawl NSCN-IM-te pawh sawiseltu zingah hian an tel. Hemi a nih avang hian sorkar kaihhruaina hnuaiah meeting hi koh a ni ta a ni.

Meeting an neih zawh hnu hian Naga Students’ Federation president chuan a thuphungin Tribal body leh civil society-te chuan an pawm phawt thu a sawi. Chief Secretary Temjen Toy kaihhruaina hnuaiah meeting hi neih a ni a, RIIN policy chu vantlang hmaa puanzar an remti tih meeting-a tel zinga mi pakhat chuan a sawi.

RIIN hi district thuneitute enpuina hnuaiah house-to-house survey neia kalpui tur a ni a, ram leilung faa chhiar theih chin chu December 1, 1963 hmaa Nagaland-a awm tawh chinte  an ni ang. List-a telte chu  indigenous inhabitant certificate pek an ni dawn a, register tawp ber siam a nih hunah chuan certificate dawng zawng zawng chu pawm a ni tawh lo thung ang.