School kal loh vangin Manipur zirtirtu 19 suspend

Manipur sorkar chuan Thawhlehni leh Nilainia school kal lo, zirtirtu 19-te  a suspend. 

Directorate of Edu­ca­tion (S) director L Nandakumar Singh chuan suspend order hi a tichhuak a ni. Suspend-te hi Lamdeng High School-a thawk pariat, Lamlong Higher Secondary School zirtirtu pakua leh Khonghampat High School zirtirtu pahnih an ni. 

Zirtirtu suspend-te hi education minister S Rajen Singh leh a team-ten school enfiaha an tlawhkual laia school-a an awm loh avangin Central Civil Services (Classification, Control and Appeal) Rules, 1965-a sub-rule (1) hnuai­ah suspend an ni tih thuchhuah chuan a tarlang. Zirtirtu suspend-te hi hrem an nih chhung hian thuneitute phalna lo chuan an awmna khua hi an chhuahsan phalsak an ni lo bawk. 

Education Minister hian sorkar school hrang hrangte tlawhkualin, school infrastructure-te a endik a ni. A school tlawh turte hi hrilh lawk loin, suprise visit a nei ṭhin a ni. Minister Rajen chuan school zirtirtute leh staff-te chu an hna ṭha taka thawk tura chahin, zirlaite tan theihtawp chhuah turin a ti. District hrang hranga school-te pawh suprise visit a nei chhunzawm zel dawn tih a sawi bawk.