PM-Kisan scheme kalpui ṭha berah AP thlang

Arunachal Pradesh chu northeast leh hilly region zingah Pradhan Mantri Kisan Samman Nidhi (PM-KISAN) scheme kalpui ṭha berah thlan a ni a, union agriculture minister Narendra Singh Tomar chuan AP agriculture minister Tage Taki leh state nodal officer (PM-KISAN) Idar Nyori hnenah Nilaini khan  award a hlan. 

PM-KISAN hi sorkar laipui flagship scheme a ni a, prime minister Narendra Modi chuan kum 2019, February 24 khan a hawng a ni. He scheme hnuaiah hian small leh marginal farmer, ram hectare hnih chin neite hnenah ṭanpuina, kum tinin Rs 6,000 pek ṭhin an ni. Heng pawisa hi loneitute account-ah thawh thumin, Rs 2,000 zelin dahsak an ni. 

He scheme hnuaia ṭanpuina hi ram pumah loneitu mi vaibelchhe 10.75 hnuaiah pek a nih tawh a, hemi atan hian cheng vaibelchhe nuai 1.15 sen a ni tawh bawk. Chief minister Pema Khandu chuan scheme kalpui ṭha lawmman an dawn avangin state agriculture department-te a lawmpui thu a twitter-ah ziakin, loneitute hamṭhatna siamsak chu an ngaih pawimawh hle tih a sawi. 

Agriculture minister Taki pawhin agriculture department officer leh field lama thawktute a lawmpui thu sawiin, officer leh official-te thawhrimna leh inpekna avangin chawimawina hi an dawng thei tih a sawi bawk.