Thla ruk atan Assam state pum "Disturbed Area"-ah puang

Assam governor Jagdish Mukhi chuan Nilaini khan Assam state pum chu thla ruk atan 'Disturbed Area' ah a puang leh.  

Sorkar thuchhuah chuan, Governor hian Armed Forces (Special Powers) Act, 1958-a Section 3 hnuaiah Assam state chu February 27 aṭanga hman ṭan turin, thla ruk chhung atan 'Disturbed Area' ah a puang chhunzawm tih a tarlang.  

Assembly inthlang tura inbuatsaih mek, Assam-a sipai thuneihna sang pekna, AFSPA hman chhunzawm a nih chhan tur erawh Governor  hian a sawilang lo. Kum 2020, August thla khan Assam sorkar chuan an state 'Disturbed Area' a puan a nihna chu thla ruk atan a lo pawtsei tawh a ni. Sorkar chuan helpawlten security force-te an beih avang leh, Assam state hmun hrang hrangah silai leh silai mu tam tham tak man a nih avangin disturbed area-a puan a nih thu a sawi. 

AFSPA hnuaiah sipaite chu thuneihna sang tak pek an nih avangin civil society group leh organisation hrang hrangten he dan hi 'dan sakei' tia sawiin an dodal nasa thei hle. He dan hnuaiah hian sipaite chuan arrest warrant neiin mi dap leh man te an ti thei a, Assam-ah hian kum 1990, November thla aṭang khan hman a lo ni tawh a ni. Hmarchhak state dang zingah Nagaland state pum, Arunachal Pradesh district ṭhenkhat leh Manipur municipal area tam zawkah he dan hi hman mek a la ni bawk.