Anti-CAA party-te Congress puiah Amit Shah-a'n a puh

Union home minister Amit Shah chuan Citizenship Amendment Act (CAA) duh lohna lantir a nih hnua Assam-a political party din tharte chuan Congress party an pui mai mai zawk nia sawiin, Congress party chu thuneihna duha a tuihal avanga AIUDF thawhpuiah a puh bawk. 

Congress-in thuneihna chang tura a beihna chu a hlawhtling dawn lo tih sawiin, BJP leh a thawhpui Asom Gana Parishad (AGP) chuan assembly inthlanah hnehna an chang leh dawn a, Assembly-a seat awm hmun thuma ṭhena hmun hnih an la dawn tih Ningania Borduwa-a vantlang inkhawm neihnaah Amit Shah chuan a sawi a ni.

 

Regional party din thar, Assam Jatiya Parishad (AJP) leh Raijor Dal-te chu nawrh huaihawt  party-te an ni tiin, heng party-te hi BJP vote lak pen a, Congress puihna atana din an ni a, mahse an thil tum hi an hlawhtling dawn lo a ni, a ti. 

Lurin  Jyoti Gogoi kaihhruai AJP leh Akhil Gogoi kaihhruai Raijor Dal-te hi Assam-a CAA dodalna nasa tak lantir a nih hnua din an ni. 

Amit Shah chuan prime minister Narendra Modi chuan Assam leh hmarchhak bial chu a hawisan ngai dawn lo tih sawiin, India ram hmasawnna tura khawl pawimawh tak an nih theihna turin theihtawp a chhuah zel dawn a ni, tiin a sawi. 

PM Modi kaihhruai sorkar hnuaiah Assam tan scheme hrang hrang hawn a ni tawh tih sawiin, Shah chuan kum sarih chhunga BJP sorkarin hna a thawh chu Congress-in kum 70 chuang hna alo thawh aiin a buk a rit zawk dawn a ni, a ti. 

"Kum nga kal ta chhung khan PM Modi chuan hmarchhak bial state hrang hrangte chu ṭum 35 vel a tlawh hman a ni," tiin Shah chuan a sawi bawk.