Tripura-ah plastic waste hmangin kawngpui siam

Tripura sorkar chuan Agartala Smart City Limited (ASCL) project hnuaiah a ṭum khatna atan non-recyclable plastic waste hmangin kawngpui a siam. 

Chief minister Biplab Kumar Deb chuan plastic waste tihtlem a nih theihna atan heng hmang hian kawng hi siam a nih thu leh, plastic-free environment siamna tura an hmalakna peng pakhat a nih thu a sawi. 

Kawng siamna atan hian plastic waste hi lakhawmin recycle a ni a, hemi hmang hian Agartala-a BK Road-a Women's College bula kawng, meter 680-a thui chu siam a ni, a ti. "Hei hi Tripura-a a vawi khatna a ni a, ṭangkai taka hmanga plastic waste-te tihtlem theihna tur entirna siam kan duh a ni," a ti. 

ASCL chief executive officer (CEO) Shailesh Kumar Yadav chuan kawng siamna atan hian bituman leh plastic hi 40:60 in an chawhpawlh tih a sawi a, bul ṭanna leh enchhina atana an siamah hian Rs nuai 70 vel an seng tih a sawi.

Plastic waste hmang hian plastic road tam zawk siam zel an tum tih a sawi bawk.