Pulwama attack sawimawi vangin Assam-ah mi pathum man

Assam police-te chuan Thawhṭanni khan social media-a Kashmir-a Pulwama attack sawimawi vang leh Pakistan fak vangin ṭhalai pathum an man. Heng mite hi sorkar laka hel leh sorkar pawisawiah puh an ni.

Tinsukia District-a Ledo Junior College zirlai Khairul Aslam chu Ledo Police-te chuan a facebook-ah ‘Pakistan Zindabad’ tih a post avangin an man a, police-te chuan Alam hi tualchhung mi ṭhenkhatin kut an thlak thu sawiin hemi avang hian complaint pawh a lut tih an sawi. Facebook-a a thu post avang hian tualchhungah dan leh thupek kenkawh kawngah buaina a chhuak niin an sawi.

Shiladitya Chetia, Supe­rintendent of Police, Tinsukia chuan Khairul Alam bakah hian midang pahnih Saikul Alam leh Riyazul Haq te pawh an man tih an sawi a, heng mi pahnihte hi inhnial theihna thil post chungchangah hian inhnamhnawihna neia rinhlelh an nih thu a sawi. IPC Sections 120(B), 121, 121(A), 124(A), 153, 153(A), 153(B) hnuaiah leh IT Act Section 67 hnuaiah man an nih thu a sawi bawk.

Lower Assam-a Goalpara district-a cheng Shahnawar Islam pawh facebbok-a Jammu & Kashmir-a Pulwama attack a fakna thu a post avangin man a nih thu police-te chuan an sawi a, IPC Sections 120(B), 153, 153(A) hnuaiah thubuai ziahluh a nih thu an sawi.

Hetih lai hian Guwahati-a Ikon Commerce College assistant professor Papri Banerjee (37) chuan Inrinni khan Kashmir-a security force-ten mi an thah leh an pawngsual thu a sawina facebook-a a post avangin Guwahati police-te chuan a lakah thubuai an ziaklut a, mahse Banerjee hi Thawhṭanni khan a awmna chin hriat a nih loh thu an sawi a ni. 

Biren Chandra Deka, in-charge of Chandmari police station chuan a nu leh pa ten Pathianni aṭang khan a bo thu an sawi tih sawiin, an zawn a ngai dawn tih a sawi.

All India United Democratic Front MLA Aminul Islam pawh kar liamta khan Pulwama chungchanga a thu post avangin a lakah thubuai ziahluh a ni tawh bawk. Aminul Islam hian journalist-te hmaa thu sawinaah a thu post an lakawi tih sawiin, Kashmir attack chu a dem thu a sawi thung.