NESO in Amit Shah thusawi dem CAB dodal zel an tum

Bharatiya Janata Party (BJP) national President Amit Shah chuan Pathianni khan Assam-a thu a sawinaah thlantlin an nih leh chuan Citizenship Amendment Bill, 2016 kalpui an tum leh dawn thu a sawi a, hei hi North East Students’ Organisation (NESO) chuan an dem thu an sawi nghal.

NESO chuan Citi­zenship Bill chu an dodal zel dawn thu an sawi nghal bawk.

Amit Shah hian National Register of Citizens (NRC) hmangin Assam-a ramdang mi lut huk tur an tihtawp thu sawiin, thuneihna an nei leh a nih chuan CAB an kalpui dawn tih a sawi.

NESO chuan Thawhṭanni khan thuchhuah siamin, Amit Shah thusawi chu hmarchhak miten CAB dodalna kawnga beihpui an thlak hmuhsitna a nih thu an sawi a ni. A thusawi chuan chiang takin hmarchhak ram neitute duhdan leh ngaih­dan bakah, an rilru natna te engahmah an ngai lo tih a tilang tih an sawi a ni. 

BJP chuan an Hindutva tihpuitlinnaa atan Bangladesh mi tam tak ramchhunga luh tir a, ram neitu zawkte hnam tlem zawka siam an tum zia tihlanna a nih thu an sawi bawk.

NESO chuan sakhuana hmanga mi an thliarhran ve loh thu sawiin, Hindu emaw Muslim emaw pawh nise, dan loa lo lut Bangladesh mi chu dan loa lo lut an ni tho tho tih an sawi a ni.

Thuchhuah an siamah NESO chuan hmarchhak ram neituten inlung rual taka an dodal, an hnam nihphung, an ṭawng leh an kalphung tichhe thei tur bill chu engtikah mah an pawm ngai dawn lo tih chiang taka tarlan an duh thu an sawi a ni.