January thla chhungin Kristian beihna ṭum 29 thleng

NGO, Alliance Defending Freedom (ADF)-India chuan kumin January thla chhung khan India ram hmun hrang hrangah Kristiante beihna ṭum 29 a thleng niin a sawi. 

ADF-India in a tarlan danin, state 13-ah Kristian-te laka tharum thawhna hi a thleng tih sawiin, heng zingah hian Uttar Pradesh-ah thleng ngun berin ṭum kua a thleng a ni. Hemi rual hian heng pawikhawihna thlengah hian FIR pakhat pawh ziahluh a nih loh avangin police-te hma lak danah pawh zawhna a siam nghal bawk. 

NGO report chuan Kristian-te beihna thlengah hian hmeichhe 26 leh naupang 25 in hliam an tuar a, mahse political party lam aṭangin an thlavang hauhna thawm engmah a awm lo a ni, a ti. Kum 2018 pawh khan thla khat chhungin Kristiante beihna hi ṭum 20 zel thleng ang a nih thu a sawi. Kuminah chuan January thlaah ṭum 29 a thleng hman a, Republic Day pawh khan Rajasthan-a Udaipur district-a Kotra tehsil-a ṭawngṭai inkhawm hman lai chu mi ṭhenkhatin lungin an tawng a, Kristian duh lohna thute an aukhum niin an sawi. Mipuite hian police-te hruaiin, ṭawngṭai inkhawma kalte chu kutte an thlak a, pastor-te pawh dawta puhin sakhaw dangte inlehluih tira puh an ni a, police-ten an man a ni, tiin a tarlang. 

Chhatisgarh-ah pawh Gondwana hnamte chuan Kristian inkhawmna hmunte chu endikin he hmuna awm mi 10 chu kut an thlak a, Bible-te pawh an pawhthler sak bawk a ni. Himachal Pradesh leh Tamil Nadu-ah pawh Kristian-te chu Hindu temple-a hnuk lut luiin Hindu pathiante an biak luih tir niin ADF chuan a tarlang bawk.