NEDA aṭangin UDP chhuak CAB vang a nih thu tarlang

Hmarchhaka Bharatiya Janata Party(BJP) kaih­hruai North East Demo­cratic Alliance (NEDA) aṭangin Me­ghalaya-a United Democratic Party (UDP) chu an chhuak a, BJP nena an thawhdunna an titawp a ni.

BJP National Secretary for ST and Minorities post aṭanga tunhnaia inhnuk­dawk Hayithung Bill Lotha pawh­in hemi chungchang hi sawiin, UDP chu Citizenship Amendment Bill, 2016 (CAB) vangin NEDA aṭangin an inhnukdawk tih a sawi.

Party vice president, Allan­­try Franklin Dkhar chuan Guwahati-a hmar­chhak political party-te inhmuh­khawmnaah khan NEDA-a regional party-te ngheh lohna a thlen tih a sawi. UDP chu NDA peng a nih loh thu sawiin, NDA chu Parliamentary Alliance a nih thu leh an party chuan Lok Sabha emaw Rajya Sabha emawah pawh MP an nei lo tih a sawi a ni.

UDP chuan na taka Citi­zenship (Amendment) Bill an dodal thu sawiin, Inner Line Permit (ILP) pawh sor­kar chuan uluk leh zuala a ngaihtuah a ngai tih a sawi. 

UDP hian NPP kaihhruai Meghalaya sorkarah MLA pariat an nei a ni.

Hmarchhak political party hrang hrang, BJP thawhpuite ngei pawhin CAB an duh loh thu hi sawi fo mah se Pathianni khan BJP president Amit Shah chuan Lok Sabha inthlanpui lo awm turah thuneihna an chang leh a nih chuan CAB chu putluh leh an tum tih a sawi.

CAB vang hian Asom Gana Parishad (AGP)-te chu NEDA aṭang hian an lo chhuak tawh bawk a ni.