Ramchhunga dan loa luh tum mi 27,000 vel dang : Sorkar laipui

Sorkar laipui chuan Supreme Court hnenah Assam-a detention centre-ah mi 938 dah an nih thu hriattirin heng zinga 823-te hi thubuai remtu pawl (tribunal) chuan ramdang mi an nih tih an tarlang bawk.

Supreme Court chuan January 28 khan sorkar laipui hnenah kum 10 kalta chhunga Assam-a detention centre-a awm zat hriattir turin a ti a ni.

Solicitor General Tushar Mehta chuan Chief Justice Ranjan Gogoi kaihhruai bench hnenah sorkar laipui leh state sorkar chuan hemi chungchangah hian kimchang takin affidavit an file tawh tih a sawi. Sorkar laipui chuan India ramchhunga dan loa luh tum mi 27,000 vel chu dan an nih thu leh hnawh kir leh an nih thu a sawi bawk.

Solicitor General chuan sorkar laipuiin cheng vaibelchhe 47 an pekchhuah bakah Assam sorkar chuan detention centre sakna tur ram an pek thu a sawi a, August 31 khian detention centre thar peih leh a nih dawn thu a sawi a ni.

Mehta hian SC bench hnena report a thehluh hian zawhna tam tak zawh a ni a, tribunal in mi 52,000 ramdang mia an puan thu leh sorkar laipuiin mi 162 chiah an thawn let nia sawi chungchang pawh zawtin SC bench chuan engtin nge miin Assam sorkar an rin theih tawh ang tiin zawhna an zawt. 

SC chuan NRC chungchang pawh zawtin mi nuai 40 an tel loh chhan a zawt a, heng mite hi ramdang mi vek an ni em tiin an zawt bawk. Court sang ber chuan Assam-a dan loa lut vanga buaina chu kum 50 tal chu a awm tawh tih an sawi a, engvanga hma la lo nge an nih tih a zawt bawk a ni. 

Mehta chuan dan loa ramchhunga lutte chu chhuahtir an nih dawn thu leh hmalak dan turte relfel a ni dawn tih a sawi.

 

SC chuan dentention centre-a awmte dinhmun diktak an hriat duh thu sawiin, mihring tihduhdahna a awm nia puhna a awm tih te an sawi a ni.