Manipur student activist bail in chhuah
Chief Judicial Magistrate, Imphal west chuan Thawhlehni khan Delhi-a sorkar pawisawia puha man, Manipuri student activist Veewon Thokchom chu bail in a chhuahtir.
Court chuan Thawhlehni khan Thokchom hi ko in, police in hren an tumna chu a hnawl a, cheng 30,000 intiam kamna atana chawitirin bail hian a chhuah a ni.
Thokchom-a lawyer Meihoubam Rakesh chuan a client chu Delhi-a exam tura a inbuatsaih mek laiin, February 15 khan Delhi leh Imphal police ṭangkawpte chuan an man tih a sawi a, a chhungte chuan a slipper bunna hun takngial pawh siamsak loin an hruaichhuak nghal tih an sawi bawk.
Veewon Thokchom hi Manipur Students’ Association Delhi president hlui niin, tunah hian adviser a ni mek a, Citizenship (Amendment) Bill, 2016 dodalna kawngah pawh khan hma a la nasa hle a ni.
Facebook-a a thu post-ah sorkar pawi a sawi nia puh vangin man a ni a, zirlai pawl hrang hrang bakah NESO pawhin man a ni chu demin chhuah an phut thu an auchhuahpui tawh bawk.