Union Minister-in Nagaland medical college lungphum phum

Union health minister Dr Harsh Vardhan chuan kar liam ta Zirtawpni khan Nagaland-a Mon-ah medical college lungphum a phum. Hei hi Nagaland-a medical college pahnihna tur a ni. 

Mon District Hospital upgrade-in medical college hi din a ni dawn a, hei hi sorkar laipuiin ram puma medical college thar 75 a din tur zinga mi a ni. Health ministry-in centrally-sponsored scheme "Establishment of new Medical Colleges attached with existing district/referall hospitals' hnuaia a thlan zingah telh a ni. He scheme hnuaiah tho hian state chhunga medical college hmasa ber, Kohima-a mi pawh sak a ni. 

Medical college thar hi cheng vaibelchhe 325 senga din a ni dawn a, a senso aṭanga cheng vaibelchhe 292 hi sorkar laipuiin a tum ang. Kum 2023-2024 ah zawhfel hman tum a ni bawk. Nagaland-a district hnufual ber zinga mi, Mon district-a medical college thar siam tur hi mi nuai 2.5 velin an chhawr ṭangkai thei dawn a ni. Minister Vardshan chuan prime minister Narendra Modi kaihhruaina hnuaa hmarchhak bial tihhmasawnna tura kawng hrang hranga hma lak a nih thu a sawi. 

Ram pumah medical college hi 562 awm mekin, heng zinga 286 chu government sector hnuaia mi niin, private sector-ah 276 a awm bawk. Medical College 175 siam mek a ni bawk. Kum 2013-14 a MBBS seat 52,000 awm ṭhin chu 84,000-ah a pung tawh tih minister chuan a sawi bawk. Hei bakah hian health and wellness centre 1,50,000 a awm tih minister chuan a sawi bawk a ni. 

Harsh Vardhan chuan sorkar laipuiin kum 2025-ah India ram aṭangin tuberculosis umbo hman a tum tih sawiin, hemi kawngah pawh state sorkar chu theihtawp chhuah turin a chah. Chief minister Neiphiu Rio pawhin thu sawiin,  Mon Medical College chu Mon district leh Nagaland mipuite chauh ni lo, an ṭhenawm state Assam leh Arunachal Pradesh bakah Myanmar mite thlengin an chhawr thei dawn a ni, a ti. Medical college hi Public-Private-Partnership hnuaiah state sorkarin a enkawl dawn tih a sawi. 

Nagaland health and family welfare minister S Pangnyu Phom chuan sorkar laipuiin medical college pahnih a sanction sak chu an tawn ngai loh, thil lawmawm tak a nih thu sawiin, heng medical college hmang hian mithiamte chherchhuah an nih bakah healtcare delivery thlengin an changtlun phah dawn hle tih a sawi a ni.