Manipur : Kuki pawl nena inkahhai puan pawtsei

Sorkar laipui leh Manipur state sorkar chuan Kuki pawl pahnih, United People’s Front (UPF) leh Kuki National Organisation (KNO) nena inkahhai, Suspension of Operations (SoO) inremna an siam chu thla ruk dang atan an pawtsei. 

Manipur-a Kuki chenna biala SoO inremna an siam hi nimin khan a tawp a, mahse an inremna hi a tawp hmain August 31 thleng atan an pawhsei leh a ni. 

New Delhi-a inremna pawhseina tur an siamah hian Kuki pawl pahnih aiawhte bakah Manipur special home secretary H Gyan Prakash leh ministry of home affairs-a joint secretary (NE) Piyush Goyal-te an tel. Kum 2008, August 22 khan sorkar laipui, state sorkar leh Kuki pawlte hian inremna hi an lo ziak ṭan a, he inremna hi sorkar chuan a pawtsei chho zel a ni. 

Manipur-ah hian Kuki armed group hi 25 vel an awm nia sawi a ni a, heng zingah 17 chu KNO hnuaia awm niin, UPF hnuaiah pariat an awm bawk.