AP-ah Covid-19 hri vei awm tawh lo

Arunachal Pradesh-ah chuan Covid-19 hri kai enkawl lai awmchhun, mi pathumte chu enkawl dam an ni leh tak avangin nimin khan an state-ah Covid-19 hri vei an awm tawh lo tih senior health official chuan a sawi. 

State surveillance officer Lobsang Jampa chuan an state-a hri kai hmuh chhuah tawh hi mi 16,836 niin, mi 56 in an thihpui tih a sawi. Inrinni khan hri kai hmuh thar an awm lo a, hri kai la awmchhunte enkawl dam an nih tak avangin Covid-19 hri kai awm lohna state an ni ta tih a sawi. 

Kar liam ta Inrinni thleng kha sample 4,05,647 test a ni tawh tih Jampa chuan a sawi bawk. Covid-19 vaccine pek chhuah mekah healthcare leh frontline worker 32,325 hnenah vaccine hi pek a ni tawh bawk.