Tripura-a mid-day meal worker-ten nawrh huaihawt

Tripura sorkarin mid-day meal scheme privatise a tum avanga lungawi loin, Ningani khan state khawpui Agartala-ah mid-deal meal worker-ten nawrh an huaihawt. 

Centre of Indian Trade Unions (CITU) hminga nawrh huaihawtnaah hian worker tel an ṭhahnem hle. Mid-day meal worker-te hian thla khatah lawmman Rs 1,500 an la a, mahse he scheme hi private kuta dah a nih chuan state chhunga worker 11,000-te chuan an hna an chan thei dawn a ni. 

Tripura-a BJP kaihhruai sorkar chuan mid-day meal scheme hi sorkarin enkawl tawh loin, private kutah hlan a tum a; rural block development area bik chu Akshaya Patra Foundation kuta hlan tum a ni. BJP sorkar a din hnuah Tripura-ah hian mid-day worker 500 vel chu a chhan sawi loin ban an lo ni tawh bawk a, hei hi BJP-in an party mi leh sate thun an duh vang nia puh a ni. 

State sorkar chuan MDM scheme privatise a tum bakah, sorkar school 20-te chu charity trust, International Society for Krishna Consciousness (ISKCON) kuta hlan a tum bawk. School education and higher eduction minister Ratan Lal Nath chuan state sorkar chuan an ram education system chu siamṭhat a tum tih a sawi a, ISKCON hian an kuta hlan tur school 20-ah hian zirna ṭha tak pek an tiam tih a sawi. Tripura-ah hian sorkar school leh government aided school 4,389 a awm.