Assam party thar President convoy bei

Assam-a political party din thar, Assam Jatiya Praishad president, Lyrinjyoti Gogoi convoy chu Pathianni khan Nalbari district-ah BJP mi leh sa nia hriatten an bei. 

He inbeihna hi Kalag area-ah thleng a ni a, hliam tuar an awm lo a, mahse car pakhat erawh tihchhiatsak an ni tih AJP thupuangtu Ziaur Rahman chuan a sawi. Police-te chuan he thil thleng chungchang hi an chhui zui nghal tih an sawi tawh bawk. 

Social media lama video clip thehdarhah, BJP flag keng mi ṭhenkhat chuan Nalbari district-a Bharkhetri constituency-a meeting tura kal, Gogoi-a convoy hi an lo dang a ni. Gogoi chuan, "He thli thleng hian BJP-in AJP dinhmun sang chho zel an ngaimawhzia a tilang chiang hle a ni. Thuneitute chuan pawikhawihtute chungah hremna an pek ngei kan phut a, inthlanna felfai tak buatsaih a nih ngei theihna turin Election Commission pawhin hma la se ka ngen bawk a ni," a ti. 

Assam assembly inthlan hi March 27 aṭangin neih a ni dawn a, thawh thuma neih niin April 1 leh 6-ah neih a ni bawk ang. Inthlan neih turah hian AJP hi anti-CAA activist, Akhil Gogoi-a pary, Raijor Dal nen an thawkdun dawn a ni. 

AJP hian Pathianni khan an party symbol tlangzarhin, Election Commission-in symbol atan lawng lem chu a pawmsak tih a sawi. 

Party president Lyrinjyoti Gogoi chuan Election Com­mission-in an party chu registered regional political party-ah a pawm tih sawiin, party symbol pawh a pawmsak tih a sawi a ni. An party symbol hi Assam tana pawimawh, Brahmaputra lui nena in­zawmna nei a ni tih sawiin, an party thupui tur chu 'Assam first, always and ever' a ni reng dawn tih Gogoi chuan a sawi bawk.