NDA in a ruka tualthat turin min nawr lui : Tarun Gogoi

Assam Chief Minister hlui leh Congress hruaitu hlun Tarun Gogoi chuan Nilaini khan sorkar laipuia NDA in sorkarna an siam hmasak zawk khan a ruka tualthat tura nawrluih an nih thu sawiin, mahse tualthahna chu an duh lo tih a sawi.

Tarun Gogoi chuan AGP CM Prafulla Kumar Mahanta hunlaia a ruka tualthahna an kalpui ṭhin avangin sorkarna an chan pawh khan a ruka tualthat tura nawrna a nasa hle tih a sawi a ni.

Gogoi chuan khatih hunlaia union home minister Lal Krishna Advani khan Punjab police chief hlui K P S Gill, hel nuaibona kawnga hmingṭha tak kha Assam-a helna tibo tura rawn dahluh a tum tih a sawi a, mahse an sorkarin an duh loh avangin an rawn dah ta lo niin a sawi bawk.

A ruka tualthahna chhunzawm tura nasa taka nawrna tawk mah se an ti duh lo tih sawiin, CM a nih tirh khan BJP chuan tualthahna chu chhunzawm duhin Advani khan hemi kengkawh chhunzawm tur hian KPS Gill pawh governor atan dah a duh a ni, a ti.

CM hlui chuan 1990's kum chawhnu lama hmaituamin ULFA hel nia rinhlelhte a thah fo chungchang leh sorkarin a tirh nia puhna awm chungchangte pawh sawichhuak lehin, Mahanta-an thuneihna a chan khan Assam-ah hian a ruka tualthahna a thleng tih a sawi. Khatih hunlai khan sorkar laipuia thuneitu chu BJP an ni a, Mahanta pawhin sorkar laipui aṭanga thupek an dawn anga che an nih thu a sawi a ni, a ti bawk.

Gogoi chuan NDA sorkar hmasa khan ULFA helte lakah nem lutukah an puh phah hial tih sawiin, pawisawi lo thah a duh loh vang a nih thu a sawi.

Prafulla Kumar Mahanta khan, term hnih lai CM a nih chhung khan All Assam Students Union-te hmalaknaa Assam Accord ziahnaa khan ramdang mi leh dan loa ramchhunga awm chinte tana cut-off year 1967 tih chu a duh lo tih a sawi. Indira Gandhi khan 1980 khan cut-off year atan hian 1967 hi a ruahman tih a sawi bawk. Hemi a nih avang hian 1971 chu cut-off year atan 1985 khan pawm a ni ta tih sawiin, ruahmanna awm hmasa kha pawm se chuan Assam buai laia nunna chan mi 855-te kha an la dam dawn niin a sawi a ni. 

BJP chuan Tarun Gogoi-a puhna hi an pha thung a, Gogoi chu inṭhendarhna politics khelh tumah an puh let thung.

Mahanta pawhin Congress sorkar hun laiin sorkar hriatpuinaa a ruka tualthahna hi a thleng zawk niin a sawi ve bawk.

BJP Assam unit general secretary Dilip Saikia chuan Congress hruaitu thusawi chu dawt a nih thu sawiin, ṭanchhan mumal awm loa inpuhna a nih thu a sawi. India inpumkhatna chu an duh ber a nih reng thu sawiin, pawisawi lo thahnaah an inhnamhnawih lo tih a sawi. Thudik a sawi a nih chuan engvangin nge chhui zui tura thupek a tihchhuah loh? tia zawhna siamin politics bawlhhlawh tak leh inṭhendarh tumna politics a khel a ni, tiin a sawi a ni.

BJP secretary chuan an party chu hmar­chhaka remna leh muanna awm duhtu an nih thu sawiin sorkar pawhin ULFA, NDFB, NSCN-te bakah hel pawl dangte pawh remna zawngin inbiakna an neihpui reng zawk tih a sawi. Dilip Saikia chuan Congress zawkin ULFA nena inbiakna an titawp niin a sawi bawk.

AGP hruaitu Prafulla Kumar Mahanta pawhin a hma chiaha CM, Congress mi Hiteswar Saikia hunlai aṭangin a ruka tualthahna hi a thleng ṭan chauh tih a sawi ve bawk. Saikia hi 1991 aṭanga 1996 chhung khan Assam CM a ni thung.

Mahanta chuan Congress zawk chu a ruka tualthahna ṭantu an nih zawk thu leh Congress sorkarin an thah hmasak ber chu Tezpur mi Bhupen Bora a nih thu a sawi. Bora hi Congress sorkar chuan ru boin an thatzui niin a sawi bawk.

Media miten thuneihna a chan hnuah tualthahna chu a thleng zui em tiha an zawhna chu chhangin Mahanta chuan security kaihhnawih reng renga thupek chu sorkar laipui aṭanga chhuak a nih thu leh sorkar laipui hnuaia awm vek a nih thu in a chhang.