NESO-in Union HRD minister hnenah an ngaihdan thlen

North East Students’ Orga­nisation (NESO) chuan union human resource development minister Ramesh Pokhriyal hnenah Draft National Education Policy 2019 chungchanga an ngaihdan an thlen.

Draft National Education Policy 2019-ah hian policy leh dan siamtu tur Centrally Constituted Body neih a ṭul thu leh, state-te chuan heta an thil rel hi an kalpui mai a ngai dawn tih a inziak. Hei hi NESO chuan duh loin an pawm theih loh thu an thlen. Central body chuan rawtna thlen ringawt se, state-in an remchan dan angin policy duhdan bulpui ber pel si loin lo kalpui se tih chu an duhdan a nih thu an thlen a ni.

Draft Education Policy chuan mi rethei leh hausa inkar a tizau sawt dawna a lan avangin helam chungchang hi ngaihpawimawh an duh bawk. English pawimawhna tihnep a, Hindi ringawt chawilar chu an pawm loh thu an thlen bawk. Hindi leh English chu India ram official language an nih ve ve thu pawh an ziak lang tel.

NESO chuan rampuma Gross Enrolment Ratio (GER) pakhat hman chu state tinin an puala GER an neihna tura thlak an duh thu an tarlang bawk. DNEP 2019-a mawhphur­tuten an ngaihdan an thlenna tura hun pek chu a tlem lutuk tih ziaklang bawkin, thla ruk dang tal hun pek belh leh an duh thute an thlen a, Education policy chu darhsarh tak leh hmanhmawh taka kalpui an duh loh thu an sawi. State tinte chu mawhphurtute nena an inrawn hnuah roadmap mumal tak buatsaih phalsak an ni tur a ni, tiin an ziak.

India-a society hrang hrang awmte chu sorkar laipui chuan zahsak se an duh tih te, state tinin zirna kawnga dikna chanvo an neihte pawh zahsak se an duh tihte an thlen a ni. Policy hmawr bawk hma ngeiin sum mamawh ang neihna turte pawh tichiang ngei se an duh thu an tarlang bawk. 

Union Minister hnena leh­kha an thehluhah hian NESO chairman Samule B Jyrwa leh secretary general Sinam Prakash Singh-te chuan hming an ziak a ni. NESO-ah hian hmarchhak state hrang hrang aṭanga zirlai pawl- All Assam Students’ Union (AASU), Khasi Students’ Union (KSU), Garo Students’ Union (GSU), All Arunachal Pradesh Students’ Union (AAPSU),  Naga Students’ Fe­deration (NSF), All Manipur Stu­dents’ Union (AMSU), Mizo Zirlai Pawl (MZP) leh Twipra Students’ Federation (TSF)-te an tel.