Assam Legislative Assembly leh UNICEF-ten LoU ziak
Pathianni khan naupang enkawl chungchangah Assam Legislative Assembly (ALA) leh UNICEF, Assam ten an thawhdunna tur Letter of Understanding (LoU) an ziak.
ALA principal secretary Mrigendra Kumar Deka leh UNICEF Assam Officer-in-Charge Sweta Patnaikten inhriatthiam tawnna hi an ziak a, ALA speaker Hitendra Nath Goswami chuan a hriatpui.
UNICEF Assam Officer-in-Charge Sweta Patnaik chuan, "Assam-ah hian nitinin kum nga hnuai lam naupang 96 leh hlamzuihin nausen 87 thi ziah ang a ni. State chhunga naupang 36% hi nuin naupai laia eitur a ei ṭhat tawk loh vang leh an pian aṭanga ni 1,000 chhunga eitur an mamawh ang an tlakchham avangin an hrisel lo. Assam hian naupang zirna, hriselna, ei leh in, faina baka an chanvo neih angte an neih theih nan hma an la mek a, hmasawnna hi nghet leh mumal zawka kalpui reng a ṭul bawk," tiin a sawi.
Assam Legislative Assembly MLA Dr Numal Momin chuan naupangten ṭanpui an mamawh zia a sawi a, ALA leh UNICEF ten inhriatthiam tawnna an ziah chuan Assam hmasawnna kawngah nasa taka a puih tur thu a sawi bawk.
Assam sorkar hian Early Childhood Care and Education Policy (ECCE) pawh an duang tawh a. Assembly session apiangin UNICEF Assam leh Welfare of Women and Children committee-ten naupang chungchanga an hmalak dan tur leh beihpui an thlakna tur district-te an rel ṭhin dawn a ni.