Assam CM-in Act East Policy chungchang sawipui

Assam chief minister Sar­bananda Sonowal chuan Pathianni khan Brahmaputra State Guest House-ah union minister of state for external affairs V Muraleedharan a hmu a, Act East Policy chungchang a sawipui. 

CM chuan Act East Policy hlawhtling taka kalpui a nih theih dan tur leh, he policy hmanga hmarchhak bialten hlawkna an hmuh theih dante union minister hi a sawipui a ni. 

Sarbananda Sonowal chuan prime minister Narendra Modi-a'n a ngaih pawimawh tak, Act East Policy chu South East Asia ramte nena economic lama thawhdunna, cultural lama inzawmna leh inṭhian­ -ṭhatna siam tura ṭhahnemngai zawka kalpui a ṭul thute a sawi. 

Sonowal chuan union minister hnenah he policy hi economic dinhmun chawisanna hmanrua atana hmang turin a  ngen. South East Asia ramte nena edu­cation, cultural exchange leh mipuite inpawhna ṭha zawk siam chhunzawm zel chu Act East Policy hlawhtlinna tura kawng pawimawh tak a ni, a ti. 

Ram hrang hrangte nena inpawhna ṭha siamna tur chuan inkalpawhna lam ṭha a pawimawh thu sawiin; Sonowal chuan minister hnenah hmarchhak biala airway, roadway, waterway, railway leh information-te tichangtlung turin a ngen nghal bawk. Hengte hi thuamṭhat a nih chuan hmarchhak bial chuan Act East Policy hi a chhawr ṭangkai tak tak thei dawn a ni, tiin a sawi.