Meghalaya CM-in state dinhmun MHA leh PMO a sawipui

Meghalaya chief minister Conrad Sangma chuan Khasi Students' Union (KSU) ten Citizenship Amendment Act (CAA) duh lohna lantira rally an neihnaa non-tribal te nena an intihbuai avanga tharum thawhna thleng chungchangah Ministry of Home Affairs (MHA) leh Prime Minister Office (PMO) biain, state chhunga dan leh thupek dinhmunte a sawipui. 

Conrad chuan MHA chuan an ngenna te rang taka chhangin, buaina chhuak zel tur thunun a nih theih nan Shillong leh Sohra-ah Central Armed Police Force (CAPF) a dah nghal tih a sawi bawk. "MHA leh PMO  lam hi thil awmdan te sawipuin nitin ka be pawp reng a ni. Sorkar laipui pawhin a ṭul dan a zirin sipai pawh tirh belh a nih tur thu min hrilh a, tunah hian company dang pahnih kan la nghak leh mek a ni," a ti. 

Boruak ṭha siam a, dan leh thupek kengkawh turin theihtawp an chhuah thu a sawi a, state mipuite pawh tharum thawhna thlen zawnga che tawh lo tur leh,  boruak muanawm a awm theihna tura hma la turin a ngen. Chief minister chuan buaina chhuak vanga hliam tuar zinga a tam zawk chu an dinhmun a ṭhat tawh thu a sawi a, ṭhenkhat erawh zai ngai an awm tih a sawi. Heng damlote enkawlna senso hi state sorkar chuan a tum vek dawn tih a sawi. 

Buaina chhuak vanga curfew puan chungchang pawh ennawn reng a nih thu sawiin, hmun ṭhenkhata chuah curfew hi puan a ni tawh tih Sangma chuan a sawi. Hengte pawh ho boruak awmdan a zirin ngaihtuah ṭhat leh zel a ni dawn a ni, a ti. 

Eptu party-ten state chhunga dan leh thupek dinhmun tlak­hniam chhana state sorkar an mawhpuhna chungchang zawhna pawh chhangin, CM Sangma chuan politics lama kaihluh hun a ni lo a, an state-a boruak ṭha a awm theihna turin political party leh pawl hrang hrang, state mipuite an ṭanrual a ngai a ni, tiin a sawi.