Sikkim CM-in Disqualify-na sût turin a ngen

Sikkim chief minister Prem Singh Tamang chuan Election Commission hnenah inthlan chuh thei lo tura a disqualify-na sût turin a ngen. 

Tamang party, Sikkim Kranti­kari Morcha party hi April thlaa state assembly inthlanah khan an chak a, May 27 khan chief minister atan lakluh a ni. Mahse eiruk thubuaiah thiam loh chantir a nih avangin inthlana chuh thei loin disqualify a ni. Mahse CM dinhmun chelh chhunzawm zel tur chuan lakluh a nih aṭanga thla ruk chhungin assembly member atan thlan tlin a ngai. 

Election Commission hnena lehkha a thawnah, Tamang chuan disqualify a nihna sut tur hian poll panel chu Representation of the People Act section 11 hmang turin a ngen. He dan hnuaiah hian EC chuan disqualify a nihna hi a sût sak emaw, a tihnep sak emaw thei a ni. 

Tamang hi kum 1990 chho khan animal husbandry minister a nih laiin bawng semna tura sorkar sum tichingpenah puh a ni a, he thubuaiah hian thiam loh chantir a ni. Kum 2017 kumtir lam khan jail-ah dah a ni a, kum 2018 August thla khan chhuah a ni. Thiam loh chantir a nih tawh avangin Representation of the People Act hnuaiah Tamang hian kum sarih chhung inthlan hi a chuh thei dawn lo a ni. 

EC official chuan Sikkim CM ngenna hi ngaihtuah mek a nih thu a sawi. EC hian Tamang disqualify-na hi a sût duh loh a nih chuan CM a nihna aṭanga a ban a ngai dawn a ni.