Manipur sorkarin dist. tinah AYUSH hospital din tum

Manipur health and family welfare minister L Jayanta­kumar chuan state sorkarin district tinah AYUSH hospital din a tum thu a sawi. 

Thoubal district-a khum 10 awmna AYUSH hospital hawnna inkhawmah minister chuan he thu hi a sawi a ni. Singh chuan health sector chu mihring tana pawimawh ber zinga pakhat a ni tih a sawi a, "Mitinin hlim taka rei tak dam an duh vek a ni. Mipuite duhdan hriatpuiin, state sorkar chuan health service ṭha zawk kalpui a tum chauh ni loin, wellness programme-te pawh a kalpui dawn a ni," a ti. Hemi atan hian district hrang hrangah health and wellness centre pawh hawn a ni tawh tih a sawi bawk. 

Jayantakumar chuan Ayush method chu thil thar a ni lo tih sawiin, mi tam tak Ayush method thlang an awm a, a inenkawlna man pawh a tlawm zawk a ni, a ti. Health sector ṭha zawk kalpuina tura mipuiten rawtna an neihte chu sorkar chuan ngaihthlaksak a inpeih reng tih a sawi. 

Minister chuan Thoubal district-a AYUSH hospital hawn thar chu mipuite tan an chhawr ṭangkai ngei a beisei thu sawiin; hei hian AYUSH centre indaih lohna pawh a phuhru dawn a ni, a ti.