Manipur : Zirlai pawlten school hawn vek phut

Manipur zirlai pawl pahnih, All Naga Students’ Association, Manipur (ANSAM) leh Kuki Students’ Organisation (KSO-GHQ) chuan an state-a Covid-19 hri leng dinhmunin ziaawm lam a pan chhoh tawh avangin school hawn vek tawh an phut. 

Thuchhuah inṭawm an siamah, ANSAM edu­cation secretary Ruwn­galar Elly leh KSO-GHQ education secretary Dou­mang Haokip-te chuan nikum March thla aṭanga zirna in khar tawh chuan zirlaite a nghawng nasa tawh hle tih sawiin, boruak a ṭhat chhoh leh ṭan tawh avangin inkaihhruaina ṭha tak siamna hnuaiah class tinten an zirna an chhunzawm a ngai tawh a ni, an ti. 

Hripui leng vanga zirna in khar a, zirlaite tana online class buatsaih ṭhin chu zirlai zawng zawngten an zawm vek thei lo a, nu leh pa leh­khathiam leh tihpui thei te, power supply nei ṭha, data network leh facility nei ṭhate chauhin hei hi an zawm thei a ni, tiin zirlai pawlte chuan an sawi.  Hill region-a cheng zirlai tam zawk chuan smartphone, laptop te an nei lo a, private tuition pawh an la thei lo a ni, an ti. Hei vang hian zirlaite hian school an kal a, an zirna an chhunzawm theih hi a pawimawh tawh a ni, tiin an sawi. 

Kum khat dawn zirna inte khar a nih hnuah, Manipur sorkar chuan January 27 aṭang khan Class X leh a chungte lamte tan school leh college a hawng leh ṭan tawh a ni.