Assam Congress-in CM laka petition thehlut

Assam Congress-a legal wing chuan Thawhṭanni khan chief electoral officer Nitin Khade hnenah memo­randum thehlutin, an state-a assembly inthlan neih tur vanga model of conduct (MCC) hman a nih hnuah pawh chief minister Sarbananda Sonwal chuan chenna atana state guest house a hman chu a la chhuahsan lo tih an sawi. CEO hnenah CM laka action la tur  hian an phut nghal bawk. 

APCC legal depar­tment chairman Niran Borah chuan survey an neihah, February 27-a Election Commission of India-in assembly inthlan neih hun tur an puan hnuah, CM hian state guest house hi chenna atan a la hmang zui zel a ni, a ti. 

Borah chuan MCC hman ṭan a nih hma khan Raj Bhawan bula awm, state guest house chu CM chenna atana hman tur a nih thu official-a puan engmah a awm lo tih a sawi. CM-in chenna atana a hman mek hi public guest house anga ngaih a ni a, hei vang hian MCC bawhchhiain Sonowal hi he hmunah a awm zui zel thei lo tih Congress hruaitu chuan a sawi a ni. CEO hnenah hemi chungchang hi bawhzui a, a rang thei ang bera state guest house chhuahsan tura CM hnena hriattirna pe turin an phut tih a sawi bawk.