Tripura sorkar hnathawkte DA 3% pek belh dawn

Sorkar laipuiin sorkar hnathawkte dearness allowance (DA) chu kum khat chuang hrek sak tawh mah se, Tripura-a BJP kaihhruai sorkar chuan state sorkar hnuaia hnathawkte leh pensioner-te DA chu 3% a pek belh dawn tih a sawi.

Tripura law and education minister Ratan Lal Nath chuan Covid-19 hri leng vanga state hrang hrangin sum lama harsatna an tawh hnuah, West Bengal tih loh chuan DA hi an la pe thei lo tih a sawi. "Sorkar laipui chuan nikum January aṭanga kumin July thla thleng atan sorkar hnathawkte DA hi a hrek sak a, mahse Tripura cabinet meeting chuan huaisen takin DA pek hi a rel a thlu a ni," tiin Nath chuan a sawi a ni. Sum lamah harsatna tawk ve mah se, state sorkar chuan sorkar hnathawkte leh pensioner-te tan DA hi 3% a pek belh leh dawn a ni, a ti. Sorkar hnathawk leh pensioner 1,90,504-te hnena DA pek belhna tur atan hian state sorkar chuan cheng vaibelchhe 320 vel a seng dawn a ni.