Manipur Congress in BJP dodalnaa inlungrual turin mipuite sawm Trinamool Congress President lawmlut

Manipur Pradesh Congress Committee hruaitute chuan Nilaini khan thuchhuah siamin  mipuite chu inpumkhata Lok Sabha inthlanpui awm turah Narendra Modi sorkar paihthla turin an sawm. 

Nilaini khan Congress Bhawan-ah mi 18 in Congress hi an zawm thar a, lawmluhna inkhawm neihnaah hian BJP sorkar paihthla tura inlungrual turin mipuite an sawm a ni.

Chief minister hlui leh Congress Legislature Party leader Okram Ibobi Singh chuan party member tharte hi lawmin, lawmna thuchah a sawinaah Lok Sabha inthlanah BJP sorkar chu paihthlaka an awm an rin thu a sawi. BJP paihthlak a nih theih nana inthurual tura chahin mipuite chuan BJP sorkar an paihthlak chuan ram inpumkhatna kawngah leh remna kawngah ramchhungah harsatna a awm tawh dawn lo niin a sawi.

Manipur PCC president Gaikhangam pawhin BJP chu bum hmang an nih thu sawiin, CAB dodalna pawh tihtawp tur a ni lo, a ti. BJP leader Amit Shah chuan BJP in sorkarna an chan chhunzawm chuan bill chu pawm a ni dawn tih a sawi thu pawh sawilang lehin, BJP hneh chu sakei hliam ang mai a nih dawn thu leh, hlauhawm taka an rawn beih let dawn avangin an fimkhur a ṭul hle dawn tih a sawi a ni. 

Nilaini-a Congress Bhavan-a lawmluh zingah hian  Trinamool Congress Manipur Pradesh President Soraisam Manaoton pawh a tel. 

Soraisam Manaoton chuan BJP sorkar paihthla turin ni hnih liamta khan Trinamool chu chhuahsanin Congress chu a zawm ta tih a sawi.