NE CM-te'n central funding pattern 90:10 hman vek duh

Hmarchhak state hrang hrang­a chief minister-te chuan central sorkar hnuaia scheme zawng zawng leh project-ah funding pattern 90:10 chu hman leh vek ni se an duh tih an sawi. 

Guwahati-a ni thum awh,  Sustainable Development Goals (SDG) Conclave 2020 neih mek­ah hmarchhak state chief minister-te hian scheme leh project hrang hranga funding pattern, 50:50 chu 19:10 ratio anga kalpui leh tur ennawn turin an phut a ni. 

NITI Aayog huaihawta Conclave 2020 buatsaih hi Thawhṭanni aṭang khan neih a ni a, chief minister-te  bakah state official, DoNER minister, central ministry official, expert leh academician, civil society leh international development organisation aiawhte an tel. 

Tripura chief minister Biplab Kumar Deb chuan fund sharing pattern hman mek, 50:50 chu ennawn a,  hmarchhak state-te tana scheme leh project hrang hrangah 90:10 hman leh an phut tih a sawi. NITI Aayog chu North Eastern Council (NEC)  hnenah thuneihna sang zawk leh fund tam zawk pe turin a ngen bawk. Special category state-ah chuan central sorkar scheme ṭhenkhat funding pattern hi 90:10 niin, a senso zinga 90% hi sorkar laipuiin a tum a, 10% hi state in a tum ve thung.

Special category state-ah hian hmarchhak state pariatte pawh an tel. Mahse he funding pattern hi central scheme zawng zawngah hman a ni lo.