Naga politcs buaina chinfel ngiatin Delhi-ah kawngzawh

Naga Student Union Delhi (NSUD) leh Delhi-a Naga com­mu­nity hrang hrang awmte ṭangkawp buatsaihin Inrinni khan New Delhi-ah kawng zawh a ni a, Delhi-a cheng Naga tam tak he hunah hian an tel.

Kawngzawh-te hian kum 20 chuang tihkhawtlai tawh, Naga politics buaina chinfelna atana India sorkar leh National Socialist Council of Nagalim -Isaac-Muivah (NSCN-IM) in inbiakna an neih, chinfel hleihtheih loh awm reng chu chinfel ngiatin kawng an zawh a ni. Kawngzawh thupuiah hian “Global Nagas Call for Imme­diate Political Solution - Honourable and Acceptable” tih an hmang.

Nepal Embassy aṭanga Jantar Mantar thleng kawngzawh in inthlan hma ngeia Naga politics buaina chinfel an ngiat a ni.

Kawngzawh huaihawttute chuan thuchhuah an siamah sorkar laipui chuan Naga buaina chu a ngaihpawimawh loh chuan eng nge thleng dawn an hriat loh thu an sawi. India sorkar leh NSCN-IM-ten inbiakna an kalpui chu kum 21 a tlin tawh thu tarlangin a hmawr bawkna erawh an siam thei lo tih an tarlang.

Kawngzawhnaah hian Naga pawl hrang hrang- Naga Hoho, NHM, NPMHR, FNR, NTC-te bakah South Asian Forum for Human Rights (SAFHR), National Alliance of People’s Movement (NAPM) leh Pakistan India Peoples' Forum for Peace & Democracy (PIPFPD) aiawhte pawh an tel a ni.

Neingulo Krome, Sec. Gen., NPMHR chuan India in an dikna chanvo neihte a hriatsak hunah chiah buaina chu chinfel a ni dawn tih sawiin, inthlan result-a nghawng neihtir tumna lam a nih loh thu a sawi.